Naiwayat ti search warrant operation kontra ti maysa a lalaki idiay Patong, Magsingal, Ilocos Sur gapu iti kaso a panaglabsing iti Republic Act 9165 wenno Comprehensive Dangerous Drugs Act ken Republic Act 10591 wenno Comprehensive Firearms and Ammunition Regulation Act.
Ti suspek ket agtawen iti duapulo ket maysa, baro, mannalon nga agnaed iti nasao nga ili.
Iti pannaki-uman ti Bombo Radyo Vigan ken ni PLt. Richard Pajo iti Magsingal Municipal Police Station, ti nasao a suspek ket positibo iti drug test ken nagpositibo iti naala a shabu manipod kenkuana.
Segun ken ni Pajo, ti nasao a suspek ket nabayagen a minonitorda gapu kadagiti aktibidad a nakairamananna.
Dagiti naala a drug evidence manipod ti suspek ket nasurok-kumurang 8.2 a gramo iti mapapati a shabu nga aggatad iti P55,760 a naipan iti tallo a heat sealed transparent plastic sachets.
Dagiti non-drug evidence a naala ket maysa a homemade caliber .38 revolver; maysa a caliber .38 ammunition; maysa a glass tooter a naglaon iti mapapati a shabu residue; maysa a color black holster; maysa a color brown ammunition box; sangapulo ket maysa a fired cartridge cases iti caliber 5.56; maysa a color black ignition switch box; dua a caliber .22 ammunitions; maysa a color black coin purse; maysa a pouch; maysa a bundle iti small unused transparent plastic sachet; ken maysa a color red lighter.
