Kaso a panaglabsing iti Republic Act 9165 wenno Comprehensive Dangerous Drugs Act of 2002 ti sangwen ti lalaki a nakemmeg iti buy-bust operation idiay Brgy. Cabuloan, Sta. Catalina, Ilocos Sur itattay, May 9, 2026.
Ti suspek ket agtawen iti duapulo ket tallo a taga-Bulala, Vigan City.
Iti pannaki-uman ti Bombo Radyo Vigan ken ni PCpt. Medel Perinion nga Acting Chief of Police iti Sta. Catalina Municipal Police Station, ti nasao nga operasyon ket intelligence driven ta adu ti naawat dagiti otoridad nga illegal nga aktibidad ti suspek.
Segun ken ni Perinion, naala manipod ti suspek iti drug evidence a tallo a piraso iti heat-sealed transparent plastic sachet a nagserbi a buy-bust item, uppat a piraso iti small heat sealed transparent plastic a nagserbi a possession, ken maysa a medium size heat sealed a naglaon ti dried marijuana.
Naala pay manipod ti suspek ti non-drug evidence a maysa a cellphone, maysa a P1,000 peso bill, sling bag, coin purse, lighter, posporo, puraw a papel a naaramat a wrapper ken tallo pay a sabali a papel a nausar a wrapper para iti buy bust item.
Ti nakemmeg a suspek ket immuna a naipan iti Ilocos Sur Provincial Hospital – Gabriela Silang tapno dumalan ti medico-legal sakbay a naipan iti Sta. Catalina Municipal Police Station.
