Nakemmeg ti maysa a lalaki gapu iti aksidente a pannakaduyokna iti kayongna idiay Barangay Miramar, Magsingal, Ilocos Sur.
Ti biktima ket lalaki nga agtawen iti duapulo ket tallo, addaan ti live-in partner idinto a ti suspek ket agtawen iti sangapulo ket walo nga agpada nga agnaed iti nasao a lugar.
Iti pannaki-uman ti Bombo Radyo Vigan ken ni PCpt. Melvin Trinidad nga ACOP iti Magsingal Municipal Police Station, bayat ti panagrambak iti fiesta iti nasao a barangay ket naggi-inom dagiti biktima ken suspek kaduada dagiti kakabagyan ken gagayyemda.
Segun ken ni Trinidad, kellaat nga adda napasamak a saan a nagkikinnaawatan dagiti agasango a rason iti nagriririanda.
Kinuna ni Trinidad a saan a karaman ti suspek iti nasao a riri ngem pinadasna iti naganawa babaen ti panangipettakna iti bote ken panangiwasawasna ngem isu metten iti aksidente a pannakaduyokna iti barukong ti biktima.
Gapu dayta ket nagsagaba ti biktima iti dunor isu a naipan iti Ilocos Sur District Hospital Magsingal ngem nayakar iti Ilocos Sur Provincial Hospital-Gabriela Silang para iti naan-anay a pannakatamingna.
Nakemmeg ti suspek ket iti agdama maisagsagana ti kaso a maipila kontra kenkuana.
