Maysa a High Value Individual iti nakemmeg iti ili ti Caoayan, Ilocos Sur idi rabii, May 9, 2026.
Ti suspek ket lalaki nga agnaed met laeng iti nasao nga ili.
Iti pannaki-uman ti Bombo Radyo Vigan ken ni PLt. Joy Callejo nga Officer-in-Charge iti Caoayan Municipal Police Station, nairana a napan nakipiesta ti suspek isu a ginundawayan dagiti otoridad a nangisayangkat iti operasyon a gappuanan ti pannakakemmeg ti suspek.
Segun ken ni Callejo, namonitor ti garaw ti suspek kalpasan nga innaganan isuna iti immunan a nakemmeg dagiti kapulisan.
Naala manipod ti suspek iti innem a sachet iti shabu a ti maysa a sachet ket nagserbi a buy-bust item.
Naduktalan nga idi pay laeng sakbay ti covid-19 pandemic ket nakemmeg manen ti suspek ngem ti kasona ket ti illegal a panagikot iti paltog wenno panaglabsing iti Republic Act 10591.
