Nakemmeg ti maysa a lalaki gapu iti panaglabsingna iti Republic Act 10591 idiay Barangay Muraya, San Juan, Ilocos Sur.
Ti suspek ket agtawen iti innem a pulo ket uppat, naasawaan, karpentero nga agnaed iti nasao a lugar.
Segun ti San Juan Municipal Police Station, impakaammo ni Barangay Captain William Poma iti nasao a barangay kadagiti pannakabagi ti linteg babaen ti panagtawagna nga adda iti mapapati a self-inflicted injury gapu iti aksidente a panagputok iti paltog a napasamak iti barangayda isu a nagresponde dagiti otoridad.
Gapu ti pasamak ket nagsagaba ti suspek ti dunor iti akin-kannigid a luppona idinto a ti caliber 38 nga addaan ti spent shell ken tallo a live ammunition-na ket naiturn over kadagiti otoridad.
Segun ti asawa ti suspek, naka-inom iti arak ti asawana idi nakitana a nakaiggem iti paltog idin nakitana nga adda gayam dunorna isu a nagpaarayat iti kapitan ti barangayda.
Naibasaan ti suspek ti constitutional rights-na kalpasan a napaay a nangipakita kadagiti dokumento a kasapulan para iti panagiggemna iti paltog.
Insigida a naipan ti lalaki iti Pira Clinic and Hospital, Cabugao para ti pannakatamingna ket iti agdama naka under hospital arrest idinto a ti naala a paltog kenkuana ket naipanen iti kustodiya iti San Juan Municipal Police Station para iti proper documentation ken disposition.
