Agpada a nagsagaba iti dunor dagiti dua a driver ti motorsiklo kalpasan a nagdinnungparda iti Barangay Road idiay Barangay Camindoroan, San Juan, Ilocos Sur idi rabii, July 19, 2026.
Ti nagmaneho iti red motorstar motorcycle ket lalaki nga agtawen iti duapulo ket tallo, baro, construction worker a nagaramat ti protective helmet, awanan ti driver’s license nga agnaed idiay Barangay Salomaque, Cabugao.
Ti nagmaneho met iti Sky Blue Yamaha Mio 125 motorcycle ket lalaki nga agtawen iti duapulo ket pito, delivery boy, nagaramat iti protective helmet, holder iti driver’s license nga agnaed idiay Barangay Camanggaan, San Juan.
Agpapadaya a direksyon ti motorstar idinto nga agpapalaud iti Mio idin nadanonda iti nasao a lugar ket kellaat a naidarusdos ti motorstar iti linya ti mio a gappuanan iti panagdinnungparda.
Gapu dayta ket nadunor iti ulo ti driver ti motorstar idinto a nagasgasan iti agduduma a paset ti bagi ti driver ti mio isu nga agpadada a naipan iti Pira Hospital, Cabugao para iti pannakatamingda.
