Pinasingkedan ti kampo ni Vice President Sara Duterte a saanda a madanagan ti agbalin nga epekto ti panagtestigo ni Ramil Madriaga iti impeachment hearing inton Martes.
Segun ken ni Atty. Salvador Panelo, dagiti immunan a sarita ni Madriaga ket agpapada laeng a kinaulbod ken no maipanen iti impeachment iti husto a forum kas iti Senado ket mapaneknekan a peke ken awan ti kinaagpaysu ti saritana.
Kinuna ni Panelo a ti kangrunaan a pakadanagan laeng ti kampo ti bise presidente ket amangan no mamati ti komite kadagiti kinaulbod ni Madriaga kangrunaan ket agpapada a mapapati a kalaban iti politika ti bise presidente dagiti mangbukbukel ti House Justice Committee.
Kabayatanna, ti maysa a bilin manipod Manila Regional Trial Court idi Mierkules ket pinalubosan ti korte a dumar-ay ni Madriaga iti panagdenggeg iti Kamara de Representantes para iti panagdenggeg iti impeachment ni VP Sara.
Nakalanad ti bilin a no man pay maipalpalubos ti panagdar-ay iti hearing ket rumbeng nga adda proper jail escort ni Madriaga ken mapalubosan laeng manipod alas otso iti bigat agingga alas singko iti malem.
