Mamati ni Senador Erwin Tulfo a dakkel a pakaibabainan ti Senado no maaddaan ti kudeta iti liderato tapno lapdan ti impeachment process proceedings kontra ken ni Vice President Sara Duterte.
Ti statement ni Tulfo ket kasaruno ti patangan maipanggep ti maipagarup a plano a pagikkaten ni Senate President Tito Sotto II sakbay pay a maipatulod iti Senado ti Articles of Impeachment manipud iti House of Representatives.
Segun ti senador, maipagarup a marigatan a maipalawag iti publiko no apay a maaddaan ti panagbaliw ti liderato kagiddan ti manamnama nga impeachment trial.
Para ken ni Tulfo, saan a masapul nga usaren ti panagbaliw ti liderato kas addang tapno maitantan wenno lapdan ti constitutional process ti impeachment.
Innayon ti senador a nasaysayaat a baybay-an a matuloy ti trial tapno maaddaan ti gundaway ni VP Sara a sungbatan dagiti alegasion kontra kenkuana.
