VIGAN CITY- Plano ni Governor Ryan Singson a pasukatan ni PSupt. Arbel Mercullo kas intelligence officer ti Ilocos Sur Police Provincial Office gapu kadagiti mapapati a saan na a pannakaaramid iti trabahona a kas iti saanna a pannaka-angot iti kaadda dagiti 133 a Chinese ken Taiwanese national a nagyan idiay San Vicente nga iligal ti ar-aramiden da.
Maipalagip a naraut ken nakemmeg dagiti gangannaet iti nagtipon a puwersa ti PNP- Anti-Cybercrime Group, Chinese police, Bureau of Immigration, Special Action Force, ISPPO ken San Vicente municipal police office idi January 13, 2018.
Segun ken ni Gov. Singson, saan laeng a ti saan a pannakamonitor ni Mercullo kadagiti gangannaet nga iligal iti aramid na ditoy probinsiya iti pakaupaayan na ngem ketdi, mairamanen iti liway da iti pannakastrek dagiti mapapati nga iligal a droga iti kabaybayan iti probinsiya kas iti nasarakan idiay Magsingal, ken ti napanawan a tugboat idiay Narvacan nga agingga ita ket awan pay nagdur-asanna.
