Nadunor ti menor de edad a nagmaneho iti motorsiklo kalpasan a dinungpar ti mini dump iti Barangay Road idiay Sitio Tulinao, Barangay Comillas North, Cervantes, Ilocos Sur idi alas syete iti rabii, May 2, 2026.
Ti nagmaneho iti red Rusi Macho TC-125 motorcycle ket agtawen iti sangpulo ket uppat, estudyante, awanan ti driver’s license nga agnaed idiay Barangay Comillas South, Cervantes idinto a ti nagmaneho iti yellow Isuzu mini drump ket lalaki nga agtawen iti uppat a pulo ket dua, naasawaan nga agnaed iti nasao met laeng a lugar.
Agturong iti bagatan a daya ti motorsiklo idi aksidente a dinungpar ti mini dump a naggapu iti bangir a direksyon.
Gapu it impact, natumba ti driver iti motorsiklo ken nagsagaba iti dunor iti agduduma a paset ti bagina ken insigida a naipan iti Ilocos Sur District Hospital-Bessang Pass, Cervantes, Ilocos Sur para iti pannakatamingna ngem nayakar iti Luis Hora Memorial Regional Hospital, Bauko, Mt. Province para iti naan-anay a panagagasna idinto a saan a naan-ano ti driver ti mini dump.
Naduktalan a ti nagmaneho ti mini dump ket naka-inom iti arak idi napasamak iti aksidente isu a naipan iti Cervantes Municipal Police Station karamanen iti lugan nga inusarna.
