Naragsak ni Zyred Phoenix Urayani Pajas, agtawen iti sangapulo ket lima a tubo iti Ilocos Sur gapu iti pannaka-qualify-na iti 12th Asian Age Group Swimming Championships – Thailand.
Iti pannaki-uman ti Bombo Radyo Vigan ken ni Zyred, ipanakkelna iti bagbagina iti pannaka-qualify-na ta umuna a gundawayan a mangirepresentar iti pagilian iti sabali a pagilian.
Segun ken ni Zyred, bayat ti Philippine Aquatics National Championship Tryouts 2026 ket nagpokus laeng isuna iti bagbagina ket saanna a pampanunoten iti kalabanna ta nasaysayaat no kitaenna dagiti rumbeng a maaramid tapno maipangabakna iti laban.
Imbingayna a manipod pay laeng idi agtawen iti sangapulo ket maysa a nangrugi a nag-swimming ket ti laeng gagemna ket ti makasursuro nga aglangoy isu a saanna nga impagarup a madanonna iti panangirepresentar iti pagilian.
Gapu iti manamnama a panagturongna idiay Thailand inton Hulyo ket agtultuloy latta iti panagsanayna tapno maiyawidna iti balitok a medalya para iti pagilian.
Kabayatanna, pinasingkedan ti ina ni Zyred a ni Nemalyn Urayani Pajas nga isuna iti kararagsakan nga ina ita gapu iti balligi iti anakna.
Segun ken ni Nemalyn, nakitana amin a sakripisyo nga impaay ti anakna manipod idi nagsanay agingga idi napasamak iti contest a naka-qualify-anna iti international ket maibagana a deserve dayta iti anakna.
Kinunana a natalek iti anakna iti sadinoman a pakadanonanna ta natibker iti pundasyonna ken nadisiplina iti aniaman nga ar-aramidenna.
