Im-imbestigaran ti Department of the Interior and Local Government (DILG) ti sumagmamano a mayor ken lokal nga opisyal idiay Cebu a nagbiahe idiay Europa bayat ti panagduprak ti Bagyo Tino iti probinsia a gappuanan ti nakaru a pannakadadael ken nakatayan iti nasurok sangagasut nga umili.
Segun ken ni Assistant Provincial Administrator Aldwen Empaces, binilin ti DILG Central Office ti Cebu Capitol nga agipasa kadagiti travel order ken mayannatup a dokumento tapno maammoan nu adda legal a pagibasaran dagiti biahe iti nasao nga opisyal.
Karaman dagiti inikkan ni Gov. Pamela Baricuatro ti Foreign Travel Authority (FTA) dagiti pito a mayor manipod iti agduduma nga ili idiay Cebu karamanen ni Provincial Board Member Andrei Duterte.
Inlawlawag ni Gov. Baricuatro a dagiti travel authority ket napirmaan sakbay pay a timmama iti bagyo ken dadduma pay a didigra iti rehiyon.
Kabayatanna, nagturong idiay London ni Tourism Secretary Christina Garcia Frasco idi November 4 ta indauluanna ti delegation iti Pilipinas iti World Travel Market ket idi nadamagna iti didigra ket nagawid nga insigida kaduana ti asawana a ni District Rep. Duke Frasco tapno idauluan ti relief operations idiay Cebu.
