Maikkaten ti probision iti linteg a mangmandato kadagiti motorsiklo nga addaan iti doble a plaka wenno maysa a plaka iti sango ken maysa iti likudan.
Daytoy ti napagnunumuan iti naisayangkat a Bicameral conference meeting tapno mapagkaykaysa ti Senate Bill 2555 ken house bill 1113 wenno ti naisingasing a pannakabalbaliw ti linteg ti doble a plaka.
Segun ken ni Senador JV Ejercito, iti bicam version ti nasao a singasing, maysa laeng ti plaka para kadagiti motorsiklo gapu iti dakkel a backlog dagiti plaka ita, a basar iti rekord ket agarup 9 million pay laeng.
Inyunay-unay ni Ejercito a nasaysayaat no adda plaka ti tunggal maysa ket kinunana a no maipapan iti pananglapped iti krimen ket napatpateg nga amin a motorsiklo ket addaan iti plaka.
Kabayatanna, segun kenni Senate Majority Leader Francis Tolentino, adda ti initial commitment ti Land Transportation Office (LTO) a mangpunno iti backlog dagiti plaka agingga iti Hunio daytoy a tawen, ngem kinunana nga ad-adda a realistic ti Hunio 2026 para iti pannakaiwaras dagitoy.
Inbaba pay ti bicam panel ti pannusa dagiti aglabsing iti nasao a linteg.
