Nakasaganan dagiti dokumento para iti pannakaipila ti kaso a panaglabsing ti Article 358 iti Revised Penal Code wenno Oral Defamation kontra ti suspek ta pinabasolna ti maysa a babai a nanggamod iti apona idiay Maratudo, Magsingal.
Iti pannaki-uman ti Bombo Radyo Vigan ken ni PLt. Richard Pajo manipod Magsingal Municipal Police Station, nagreport ti biktima kadagiti pannakabagi ti linteg babaen ti panangipresentarna iti certification to file action kalpasan a saan a nasettle iti barangayda iti reklamona.
Segun ken ni Pajo, nagsakit ti apo ti suspek ket idi saan a malaingan ket pinabasolda ti biktima a ginamodna ken parparwarenda ti latin a libro nga inaramatna a paggamod.
Gapu ta ipaganetget ti biktima nga awan ti kinaagpaysu iti nasao a pammabasol ket ibilangna a pakaibabainan ti dayawna iti inaramid ti suspek.
Immunan a nagsarita ti suspek ken biktima iti barangayda babaen ti pannakaimatang ti barangay kapitan ngem gapu ta saan a nasimpa ket naidanonen kadagiti pannakabagi ti linteg.
VIDEO – PLT. RICHARD PAJO
