Dead on arrival iti ospital ti maysa a lalaki a nasarakan a nakaidda iti sirok iti mangga idiay Barangay San Clemente, Magsingal, Ilocos Sur idi kalman, May 1, 2026.
Ti natay ket lalaki nga agtawen iti innem a pulo ket tallo, baro, nga agnaed idiay Barangay San Clemente, Magsingal.
Nakaawat ti Magsingal Municipal Police Station ti tawag manipod concerned citizen ket naipakaammo iti pannakasarak ti lalaki iti nasao a lugar isu nga insigida a nagturong dagiti otoridad.
Nakita pay laeng ti nasao a lalaki idi kalman iti ala una iti malem nga agin-indayon iti sirok iti kayo ti mangga nga asideg iti pagtaenganna ket idi alas tres y media iti isu met la nga aldaw, nakitada laengen a saanen nga aggar-garaw.
Naipan nga insigida ti lalaki iti Ilocos Sur District Hospital, Magsingal babaen kadagiti nagresponde a kameng ti Philippine National Police ken Rural Health Unit personnel ngem naideklarar a dead on arrival babaen ti attending physician-na.
Nammoan a ti biktima ket agsagsagaba ti mental illness ket patien dagiti kabagyan ken karrubana nga awan iti senyales iti foul play iti insidente.
