Dead on arrival iti ospital ti maysa nga ama ta nalmes itay alas dos baente singko iti malem iti kabaybayan idiay Barangay Sived, Sto. Domingo, Ilocos Sur bayat ti panangpadasna a nangalaw iti putotna.
Ti biktima ket ni Jayson Pabo, agtawen iti uppat a pulo ket innem, naasawaan, bus conductor nga agnaed idiay Barangay An-annam, Bantay.
Iti pannaki-uman ti Bombo Radyo Vigan ken ni PLt. William Costales Jr. a Deputy Chief iti Sto. Domingo Municipal Police Station, bayat iti panagdigos iti kabaybayan ti putot ti biktima ket napansinna a malmalmes ti putotna isu nga impadasna a napan insalbar ngem napaay ta agpadada a naguyod iti kuryente iti danum.
Segun ken ni Costales, nakita iti pasamak ni Rolando Paa Jr. a kaanakan ti biktima, isu nga impadasna nga inalaw ida ngem ti laeng putot ti biktima iti naguyodna.
Napansin dagiti tallo a tanod iti nasao a barangay iti pasamak isu a timmulongda a gappuanan ti panangalawda ti biktima.
Naipan ti biktima iti Ilocos Sur District Hospital- Magsingal ngem naideklarar a dead on arrival babaen ti attending physician-na.
Kinuna ni Costales a napan iti baybay ti biktima kaduana ti pamiliana a nangaldaw ngem isu metten ti pannakalmesna.
Balakadna kadagiti umili a nasaysayaat a kitaen iti panniempo nu agturong iti kabaybayan nangruna nu naangin tapno saan a maisagmak.
VIDEO – PLT. WILLIAM COSTALES JR.
