Nasurok P500,000 a gatad iti alahas ken P30,000 a kuarta dagiti agasawa iti mapapati a natakaw iti maysa a pagtaengan idiay Barangay San Nicolas, Candon City.
Dagiti biktima ket lalaki nga agtawen iti limapulo ket innem, naasawaan, government security personnel iti ISPSC Main Campus ken asawana nga agtawen iti uppat a pulo ket siam, nga agpada nga agnaed idiay Barangay San Nicolas, Candon City.
Ti met suspek ket lalaki nga addan iti husto a tawen, baro, carwash helper iti nasao a lugar.
Nagreport dagiti biktima iti Candon City Police Station ket impakaammoda iti pannakatakaw dagiti alas ken kuartada.
Idi April 6 iti alas dose y media iti aldaw ket pimmanawda a dua iti pagtaenganda ngem nabati ti ina ti babai ken anakna nga agtawen iti innem.
Ti alas sais agingga alas syete iti rabii iti isu met la nga aldaw, nakaawiden dagiti agasawa ti pagtaenganda idin napansinda a naka-lock iti master’s bedroom, ngem pinanawanda a silulukat tapno makapan latta ti ina ti babai a biktima nga agdalus.
Iti kaaddada iti ruar iti kuarto ket napansin dagiti agasawa a ti akin-sango a tawa iti kuartoda ket nakalukat isu nga inayabanda ti kanakanda a siumrek iti nasao a tawa tapno malukatan ti arwangan iti nasao a kuarto.
Idi naserrekdan iti kuarto ket nadiskubreda a mapukpukawen ti maysa a branded a wristwatch; agduduma nga alahas pakairamanan iti uppat a kwentas; uppat a piraso iti aritos; tallo a singsing; uppat a bracelets ken innem a bangles a mapatta-patta amin nga aggatad iti P500,000 ken uray ti kuarta a P30,000 ket mapukpukaw.
Sigurado dagiti biktima a nai-lockda iti tawa iti kuarto ngem idi nakasangpetda ket nakalukaten.
Mapapati a nagna ti suspek iti main door ken iti salas sa nagderetso iti kuarto ken nagna laengen iti tawa iti kuarto idi pimmanaw.
Isagsaganan ti Candon City Police Station ti kaso a maipila kontra ti suspek.
