Awan pay ti naawat ti Philippine National Police nga aniaman a komunikasion wenno direktiba manipud iti maseknan nga otoridad ti ahensia mainaig iti inruar a warrant of arrest ti International Criminal Court kontra ken ni Senador Ronald “Bato” Dela Rosa.
Pinasingkedan ni PNP Chief Gen. Jose Melencio Nartatez Jr. nga awan iti posision ti kapulisan a mangted ti nayon a komento bayat a maisaysayangkat ti beripikasion ken koordinasion kadagiti maseknan nga ahensia.
Impaganetget ti PNP nga aniaman a patangan mainaig iti nadakamat nga ICC warrant ket masapul a dumalan iti husto a proseso ti linteg, due process ken koordinasion ti gobierno ken international law enforcement mechanisms.
Iti baet daytoy, impasigurado ti PNP a nakasagana da a sumurot iti aniaman a legal a direktiba ken proseso kas bilang maaddaan ti opisial a bilin.
