Naawaten ni Atty. Estelita Cordero ti 4 pay a bilang iti kaso a cyberlibel nga impila kenkuana ni Former Ilocos Sur Gov. Chavit Singson itattay bigat, July 8, 2026.
Dayta ket kalpasan iti pito pay a bilang iti nasao met la a kaso idi napan a lawas a naawatna kalpasan a naiserbi ti warrant of arrest-na nga inruar ti Presiding Judge iti Branch 93, Regional Trial Court, National Capital First Judicial Region, Quezon City a napetsaan idi July 1, 2026 a ti tunggal bilang ket narekomendaran ti pyansa a P48,000.
Iti pannaki-uman ti Bombo Radyo Vigan ken ni Atty. Cordero, iti panagturongna iti Criminal Investigation and Detection Group (CIDG)-Ilocos Sur, nakasagana latta isuna a sumango iti aniaman a harassment nga ited kenkuana ni Chavit ken kakaduana tapno mailaban iti hustisya para iti probinsia.
Segun ken ni Atty. Cordero, mayur-uray pay iti tallo a bilang iti isu met laeng a kaso ta naibaga kenkuana a sangapulo ket uppat amin a bilang iti maipila ngem in-inut iti pannakaipatulod dagitoy kenkuana.
Patienna nga imanmanipula amin ni Singson dagiti nasao nga aktibidad tapno maharass isuna ken dagiti kakaduana gapu iti panagsarsaritada mapanggep kadagiti kalokoanna a rumbeng a sungbatanna kadagiti umili iti probinsia.
No pay kasta ket natalek iti baet dagiti kaso a sangsangwenna ta nadagdagsen nga amang iti manamnama a sangwen ni Singson nga isu ti plunder ta agar-garawen ti nasao a kaso.
