Inarestar ti Criminal Investigation and Detection Group – Ilocos Sur ni Atty. Estelita ‘Tillie’ Cordero iti pagtaenganna ita nga aldaw gapu iti 7 a bilang ti cyber libel nga impila ni dati nga Ilocos Sur Governor Chavit Singson.
Karaman kadagiti nagtaudan ti kaso dagiti banat ti abogado kontra ken ni Singson iti social media.
Iti pannaki-uman ti Bombo Radyo Vigan ken ni Cordero, nakasagana isuna a mangsungbat kadagiti pammabasul ni Singson.
Inkalinteganna a ti kaso ket gapu ti panangilabanna iti karbengan dagiti kalugaranna iti probinsia isu a pagbabaraan isuna ti dati a gobernador.
Innayon ni Cordero a daytoyen ti maikatlo a gundaway nga ipaarestar isuna ni Singson.
Kinarit met ti abogado ti dati nga opisial a tumestigo inton adda panagdengneg tapno isuna ti mang-cross examine kenkuana.
Umabot iti P322,000 ti piansa para iti pannaka-wayawaya ti abogado ta P46,000 ti nailatang iti kada bilang ti kaso.
