Sagsaganaan ni Atty. Estelita Disini Cordero iti sabali pay a pito a bilang ti cyber libel nga ipila ni dati nga Ilocos Sur Governor Chavit Singson, kalpasan a naarestar idi napan a lawas gapu met laeng iti pito a bilang ti cyber libel.
Iti pannaki-uman ti Bombo Radyo Vigan ken ni Atty. Cordero, iti insayangkat nga emergency rally iti Warriors Ilocos Sur iti sangwanan iti headquarters-da idiay San Jose, Narvacan ket impakaammona iti kasasaadna kalpasan iti pannaka-arestarna gapu iti cyber libel.
Segun ken ni Atty. Cordero, awan iti parikot kenkuana no uray mano a cyber libel iti maipila kontra kenkuana ta agsasao met iti kinapudno ken ilablabanna iti karbengan dagiti umili.
Kinunana nga iti baet a maymaysa a complaint laeng ket biningay-bingay iti dati a gobernador tapno agbalin a 14 counts iti sangwenna isu a manamnama pay iti pito a maipila kenkuana.
Iti baet dayta ket natalek ni Atty. Cordero a malasatanna latta dagiti nasao a kaso ta no yarig iti kaso ti dati a gobernador a plunder, graft ken corruption ket nadagdagsen pay nga amang ngem kenkuana.
