Naka-piyansan ni Atty. Estelita Cordero iti 6 pay a bilang ti cyber-libel nga impila kontra kenkuana ni dati nga Ilocos Sur Governor Chavit Singson.
Iti agdama ket addan iti kabuklan a sangapulo ket pito a bilang ti cyber libel a naipila kontra kenkuana.
Ti naudi nga innem a bilang ti cyber-libel a naipila kontra ken ni Cordero ket adda nailatang a piyansa-na a P10, 000 iti tunggal bilang.
Iti pannakiuman ti Bombo Radyo Vigan ken ni Atty. Cordero, pinasingkedan na a mapapati a nagtaud dagiti naipila a cyber-libel kontra kenkuana manipud kadagiti naibaga wenno naipablaak na kalpasan ti panangipila na ti plunder ken graft and corruption case kontra ken ni Singson.
Segun ken ni Cordero, ti plunder case ket gapu ti panangilako ti dati a gobernador ti daga ti public market iti ili ti Narvacan ti overprice, ken ti graft and corrupt case met ket gapu ti panangaramat na ti public land a nangipatakderan na ti mansion ni Singson.
