Mapatta-patta a nasurok-kumurang P50, 000 ti gatad ti nadadael iti pannaka-uram ti maysa a pagtaengan idiay Barangay Cabittaogan Sta. Catalina, Ilocos Sur.
Ti akinkukua ti balay ket agtawen iti uppat a pulo ket pito, welder, residente ti nadakamat nga ili.
Maibasar iti imbestigasion, napanawan nga awan ti agbambantay ti air-condition unit iti uneg ti pagtaengan gapu ta ti akinkukua ket immatendar iti maysa okasion ti kabagyanna.
Kalpasan ti sumagmamano a gundaway, nakaawat ti tawag ti Bureau of Fire Protection (BFP) Sta. Catalina manipud iti maysa a concerned citizen a nangibaga kadakuada a ti nadakamat a pagtaengan ket maur-uram.
Dagus a nagresponde dagiti kameng ti BFP ket nadepdep da ti uram nga immabot iti first alarm.
Dukduktalen pay laeng dagiti otoridad no ania ti nagtaudan ti uram.
