Maysa a traysikel ken kotse iti karaman iti aksidente idiay Barangay Oaig Daya, Candon City idi June 28, 2025 iti alas kuatro singkwentay singko iti malem.
Ti nagmaneho iti black Rusi 150 tricycle ket ni Benjamin Rabara Gagtan, agtawen iti innem a pulo ket walo, naasawaan, tricycle driver nga agnaed idiay Calongbuyan, Candon kadua dagiti pasaherona a da Jodane Caampued, agtawen iti duapulo nga agnaed idiay Brgy. Bagani Ubbog, Candon ken Rosenel Gadingan, agtawen iti sangapulo ket siam a taga-Barangay San Antonio, Candon City.
Ti met nagmaneho iti black Mitsubishi Mirage ket ni Rochelle Palapala, agtawen iti uppat a pulo ket pito, naasawaan nga agnaed idiay Barangay Calaoa-an, Candon City.
Iti pannaki-uman ti Bombo Radyo Vigan ken ni PLt. Jovelyn Antalan manipod Candon City Police Station, simrek ti traysikel iti national highway a naggapu iti laud a direksyon idi nadanonna iti nasao a lugar ket kellaat a nag-over take ti kotse nga agturong iti bagatan nga isun ti nakadungparanna iti traysikel.
Segun ken ni Antalan, awan iti napakaroan iti aksidente ta nagsakit laeng iti bagbagi dagiti dua a pasahero isu a napaagasda iti Ilocos Sur Medical Center, Candon City ket ita nasayaaten ti kasasaadda idinto a dagiti dua a driver ket saan a naan-ano.
Palagip ni Antalan kadagiti agmanmaneho iti kanayon a pagalerto, panagannad ken pananglagip dagiti pagannurotan ken linteg iti kalsada tapno maliklik iti aksidente.
VIDEO – PLT. JOVELYN ANTALAN
