Idurduron ti House of Representatives ti temporario a panangsuspenso wenno panangitantan iti panagbayadan ti loan dagiti tsuper ken operator tapno marisut ti epekto ti krisis iti langis.
Iti napasamak a LEAD hearing, impakaammo ti Landbank ken Bankers Association of the Philippines (BAP) a nakasagana da nga adalen ti kiddaw a moratorium a kapada ti naipatungpal idi panawen ti pandemya.
Ti singasing ket manipud ken ni Quezon City Representative Franz Pumaren, chairperson ti House Committee on Transportation, kalpasan nga immasideg kenkuana iti agduduma a grupo ti bus, jeepney ken dagiti hauler wenno trucker.
Segun ken ni Pumaren, marigatanen dagiti operator iti panagbayad ti loan da ken maiyannatop a penalty gapu iti bassit a pastrek gapu iti nangato a presio ti produkto petrolyo.
