Nadundunor dagiti tallo a tattao iti aksidente a nakairamanan dagiti dua a nagmotorsiklo iti national highway idiay Sitio Cabaroan, Barangay Cuancabal, Cabugao, Ilocos Sur iti alas dose disi otso iti malem idi kalman, November 23, 2024.
Dagiti karaman ket ti nagmaneho iti Yamaha Sniper 155 a ni Karl Ringor Cacdac, agtawen iti duapulo ket uppat, consultant iti solar energy, addaan driver’s license; kaduana ti back ride-na a ni Editha Ringor Cacdac, agtawen iti limapulo ket dua, naasawaan, yakult seller nga agpada a nagaramat ti helmet ken agnaed idiay Barangay 16, Lang-ayan, Currimao, Ilocos Norte idinto a ti nagmaneho iti Honda Click 125 ket ni Jose Jeffrey Cerbas Naval, agtawen iti tallopulo ket innem, baro, massage therapist, nagaramat ti helmet, adda driver’s license na nga agnaed iti nasao a lugar.
Iti pannakipatpatang ti Bombo Radyo Vigan ken ni PLt. Richard Pajo a Deputy Chief iti Cabugao Municipal Police Station, agpada nga agpapabagatan a direksyon dagiti dua a lugan idin nagsikko iti kannigid ti Honda click ket idi addan iti tengnga iti kalsada ket nadungpar iti napaspas a naka-Yamaha Sniper isu nga agpapadada a nabaliktad.
Segun ken ni Pajo, nadunor iti ngiwat ti nagmaneho iti Yamaha Sniper, na-fracture iti ima ti back ride-na idinto nga agalen ti driver ti Honda click ti nasakit a bakrangna isu nga agpapadada a naipan iti Pira Hospital – Cabugao babaen kadagiti nagresponde a personnel iti Philippine National Police ken Bureau of Fire Protection.
Nupay kasta ket naduktalan nga awan ti naka-inom iti arak idi napasamak iti aksidente ta maibilang nga accident prone area iti nasao a lugar.
Kabayatanna, palagip ni Pajo kadagiti motorista iti panagan-annad nga agmaneho tapno maliklikan ti aksidente ken nu madanon iti sipnget wenno rabii ket nasaysayaat nga agaramat ti reflectorized vest tapno maliklikan iti aniaman nga aksidente.
VIDEO – PLT. RICHARD PAJO
