Silulukat ti Ilocos Sur Provincial Hospital – Gabriela Silang a maaddaan iti imbestigasyon maipanggep iti napasamak a pannakatay ti maysa a maladaga kalpasan iti mapapati a panangbaybay-a dagiti staff iti nagpasngay nga ina.
Iti pannaki-uman ti Bombo Radyo Vigan ken ni Dr. Pocholo Baquiran a Chief iti nasao nga ospital, kinunana a naireport kenkuana iti nasao a pasamak ket inlawlawagna nga iti baet a nagturong ti pasyente kaduana ti asawana idi May 15 ket saan a napaanak ta saan pay a rumuar ti ubing ken saan a pudno a nabtak iti bag of water ti ina isu a pinag-waiver-da isuda tapno makaawid pay laeng ket naibaga nga agsubli laengen iti Lunes para iti panag-check-up.
Segun ken ni Baquiran, Martes (May19) idi nag-labor ti pasyente ket iti ala una iti malem iti isu met la nga aldaw naisayangkat iti pannaka-CS ti ina.
Maibasar iti report ken ni Baquiran, sibibiag ti ubing a naipasngay ket saan nga insigida a natay ngem ababa iti apgar score iti ubing idi naipasngay isu a saan a nakalasat.
Ngem no pay kasta, silulukat iti opisina ni Baquiran para iti pannaki-dayalogo iti pamilia ti biktima ken tapno maammoan iti pudno a napasamak.
Ingkarina a no maduktalanna nga adda nagkurangan iti ospital ket maipataw iti umno nga addang para kadagiti nagkurang iti serbisyona.
Immunan a nagturong iti Bombo Radyo Vigan ni Ofelia Pajo a taga-San Isidro, Bantay a lola dagiti agasawa a napukawan/natayan iti anak ket impakaammona iti nasao a pasamak.
Iti istorya ni Pajo ket rabii idi ti May 15 idi bimtak iti danuman ti apona isu nga impanda iti ospital ngem saan a na-admit ta pinagawid laeng ida dagiti staff ket kinunada a saan pay nga aganak ti pasyente isu a nasaysayaat laengen nga agsubli iti May 18 para iti pannaka-ultrasound-na.
Kinuna a naiyawid ti apona iti baet nga ag-agalenna unayen iti sakit ket inurayda laengen iti panagcheck-up iti Lunes, ngem idi nadanon ket saan latta a na-admit.
Gapu dayta, nagawid manen ti biktima ket iti agsapa iti Martes (7AM), gapu ta addan iti dara a rimmuar manipod iti pasyente ket intarayda manen iti ospital para iti panaganakna.
Mapapati nga iti baet a saanen a kabaelan pay ti ina nga agpasngay ket mapapati nga ipilit dagiti staff nga aganak latta a normal.
Kinuna pay ni Pajo nga iti baet nga ammon dagiti dua a nurse nga awanen ti biag ti maladaga sipod adda iti uneg iti tiyan pay laeng iti apona ket impilitda nga intalmeg iti namin-ano a daras tapno mairuar agingga naisayangkat met laeng iti pannaka-CS iti apona.
Kabayatanna, pinasingkedan ni Jay Mark wenno ti asawa ti pasyente wenno ama ti natay a maladaga nga idi pay laeng nagturongda iti ospital idi May 15 ket uray kasano pilitda nga ipa-admit iti asawana ket saan a pinalubosan iti ospital no diketdi mapapati nga impilitda a papirmaen iti waiver, ket gapu ta awan iti maaramidanda – pinirmaanda lattan ket nagawiddan iti pagtaenganda ken inkeddengda a suroten iti imbagada kadakuada.
No pay kasta ket hustisya iti kalikagum ti pamilia gapu iti napukaw a biag ti maladaga.
