Agtaltalinaed iti Intensive Care Unit (ICU) ti driver ti pickup kalpasan a nakadinnungparna iti maysa a cargo truck iti national highway ti Barangay Naguiddayan, Bantay, Ilocos Sur a napasamak idi July 29, 2026.
Ti nagmaneho ti Mitsubishi Canter ket lalaki nga agtawen iti uppat a pulo ket maysa, naasawaan nga agnaed idiay Rizal, Odiongan, Romblon.
Ti met nagmaneho iti black Ford Ranger ket lalaki nga agnaed idiay Barangay Tay-ac, Bantay, Ilocos Sur.
Iti pannaki-uman ti Bombo Radyo Vigan ken ni PLt. Ronie Corpuz nga OIC, Bantay Municipal Police Station, agpapalaud a direksyon ti truck iti paset ti national highway idinto nga agpapabagatan ti pickup nga adda iti provincial road idin nadanonda iti nasao a lugar ket kellat lattan a simrek ti pickup iti national highway a gappuanan ti pannakadungpar iti truck.
Segun ken ni Corpuz, ti nadungpar a paset ti pick-up ket iti mismo a batog ti driver’s seat isu a gapu ti impact iti aksidente ket naawanan ti puot ti driver ti pickup ket naipaagas iti Ilocos Sur Provincial Hospital – Gabriela Silang para iti pannakatamingna ket iti agdama ket agtaltalinaed iti ICU idinto a saan a naan-ano ti driver ti truck.
Gapu ti aksidente ket nakaru ti damage dagiti dua a lugan ngem saan pay nga ammo no mano ti gatad iti nadadael a paset.
Kabayatanna, addan ti inisyal a nagpatangan ti pamilia ti driver ti pickup ken ti driver ti truck maipanggep iti magastos iti ospital ngem manamnama nga addanto pay sumaruno a patanganda maipanggep iti napasamak nga aksidente.
