Natalgeden ti kasasaad ti biktima iti pammaltog a napasamak idiay Barangay Pagsanaan Norte, Magsingal, Ilocos Sur itay August 16, 2026.
Ti biktima ket maysa nga agtawen-iti-limapulo ket uppat a mannalon, agnaed idiay Barangay Miramar, Magsingal idinto a dagiti suspek ket dua a lalaki a nagkalugan iti Honda TMX Red 125 a motorsiklo.
Iti pannaki-uman ti Bombo Radyo Vigan ken ni PCpt. Melvin Trinidad iti Magsingal Municipal Police Station, apaman a naawatda ti pakaammo maipanggep ti pammaltog a napasamak iti nasao a lugar ket nagrespondeda ket idi nakadanonda, naipanen ti biktima iti Ilocos Sur District Hospital – Magsingal babaen kadagiti kabagyanna para iti pannakatamingna ngem nayakar iti Ilocos Sur Provincial Hospital – Gabriela Silang.
Segun ken ni Trinidad, nagsagaba ti biktima iti dua a tama iti bala ti paltog iti tiyan ken akin-kannawan a sakana.
Iti inisyal nga imbestigasion, mapapati a pinadaanan dagiti suspek ti biktima a napan nangipastor iti bakana iti taltalonan ket idi naikkanda iti gundaway ket isun iti panangpaltogda kenkuana.
Saan a nailasin dagiti witness dagiti suspek ngem inladawanda laeng dagitoy a saan a nakasuot iti helmet ti maysa ngem nakasuot laeng iti kapote idinto a ti maysa ket nakausar ti helmet ngem half face laeng.
Agtultuloy iti imbestigasion dagiti otoridad maipanggep iti nasao a pammaltog ta manamnama a kasaritada ti biktima para iti naan-anay a detalye iti posible a rason iti insidente.
