Kinontra ti Malakanyang ti imbaga ni dati a Presidente Rodrigo Duterte nga agtaltalinaed nga agraira ti krimen iti agdama nga administrasyon ta bimmaba ti krimen a nairekord manipod ni President Ferdinand Marcos Jr. iti nagtugaw iti puesto.
Dayta iti pinasingkedan ni Executive Secretary Lucas Bersamin kalpasan a nagsarita ti dati a president iti Senate hearing idi kalman.
Segun ken ni Bersamin, awan ti kinaagpaysu ti sinarita ni Duterte nga agtaltalinaed a nakaru iti krimen iti pagilian.
Kinunana a mapaneknekan ti nasao a banag babaen ti panangipakitada ti statistics manipod Philippine National Police.
Innayon ti dati a Chief Justice a nagun-od ti Marcos administration ti stability ken napagtalinaed ti peace and order iti pagilian nga awan ti foregoing due process wenno panangilaksid ti basic human rights iti aniaman a Pilipino.
