Agpada a nadunor dagiti nagmaneho iti motorsiklo ken E-bike gapu iti panagdinnungparda iti national highway idiay Barangay Nanguneg, Narvacan, Ilocos Sur itattay, May 18, 2026.
Ti nagmaneho iti Yamaha Aerox motorcycle ket lalaki nga agtawen iti duapulo ket siam, naasawaan, butcher nga agnaed idiay Barangay Dirdirig, Burgos, Ilocos Sur a nagaramat iti helmet.
Ti met nagmaneho iti E-bike ket babai nga agtawen iti tallopulo ket innem, naasawaan, BHW ken agnaed idiay Barangay Nanguneg, Narvacan.
Agpapabagatan a direksyon ti nakamotorsiklo idin nadanonna iti nasao a lugar ket pinanggep ti naka-E-bike a mapan iti northbound lane manipod iti laud a paset iti kalsada a rason iti panagdinnungparda.
Gapu dayta ket nadunor dagiti dua a driver isu a naipanda iti Ilocos Sur District Hospital – Narvacan para iti pannakatamingda.
