Mapapati a kuarta iti rason no apay a gimmura ti maysa a lalaki a nangitunda iti panangtagbatna iti namin-ano a daras iti kabsatna a babai idiay Barangay Bantugo, Nagbukel, Ilocos Sur idi kalman, August 13, 2025.
Dagiti agkabsat ket agpada a senior citizen ta ti biktima ket agtawen iti pitopulo ket pito idinto a ti suspek ket agtawen iti pitopulo ket walo.
Iti pannaki-uman ti Bombo Radyo Vigan ken ni PCapt. Albert Ramos Jr. manipod iti Nagbukel Municipal Police Station, nakaawatda ti tawag manipod concern citizen mainaig iti napasamak a panagtagbat iti nasao a lugar isu a nagrespondeda a gappuanan ti pannakakemmeg ti suspek ken pannakaipan iti ospital ti biktima.
Segun ken ni Ramos, ti biktima ket mapan koma agiwayway ti dingwenna a kalding idin pinasungdan ti suspek iti paraanganda nga isun ti nangtagbatanna iti namin-ano a daras.
Nagsagaba iti dunor iti ulo, rupa, tengnged, bukot, takyag, ima ken barukong ti biktima isu a naipan iti Narvacan District Hospital para iti pannakatamingna.
Inlawlawag ni Ramos a naubra ti suspek ti pannagbat ta mapapati a dinadaelan daytoy iti biktima kadagiti tallo a putotna nga adda idiay Amerika isu nga imbes a binulan a makaawat iti sustento manipod kadakuada ket nagsardengda idi Hunyo isu a marigatanen iti pagbiaganna ken panagagasna para iti tuberculosis-na.
Iti agdama ket agtaltalinaed iti ospital ti biktima para iti pannakatamingna idinto nga adda iti Nagbukel Police Station ti suspek ket naipila ti kaso a frustrated murder gapu iti inaramidna.
