Saanen nga agipila ti kaso ti lalaki a biktima kalpasan a tinagbat iti lolona idi rabii, April 21, 2026 idiay Barangay Ora East, Bantay, Ilocos Sur ta nakapagsasarita dagiti kameng ti pamiliada.
Ti biktima ket lalaki nga agtawen iti tallopulo, naasawaan, construction worker.
Idinto a ti suspek ket agtawen iti walopulo ket walo, balo nga agpada nga agnaed idiay Barangay Ora East.
Iti pannaki-uman ti Bombo Radyo Vigan ken ni PCpt. Donaldson Pagalanan nga ACOP iti Bantay Municipal Police Station, ti pannagbat ket mapapati a nagtaud iti bonsai a mula ti biktima na dinadael ti lolona.
Segun ken ni Pagalanan, apaman a nakasangpet ti biktima a mapapati a naka-inom iti arak ket nagturong iti ayan ti lolona tapno makipatang ngem idi nakdanon ket mapapati a pinilitna iti simrek isu nga idi nalukatanna iti arwangan ket isun ti panangtagbat kenkuana ti lolona babaen ti buneng.
Nagsagaba ti biktima iti dunor iti ulo isu a naipan iti Ilocos Sur Provincial Hospital para iti pannakatamingna idinto a nakemmeg ti suspek.
Naala manipod iti nakapasamakan iti insidente ti buneng nga inusar ti suspek a tallopulo a pulgada iti kaatiddogna karaman ti apputanna.
Kabayatanna, agbabawi ti suspek a lolo iti inaramidna iti apona ngem inkalinteganna a saanna a maaramid iti kasdiay no saan a sinerrek ti biktima ta nagbuteng laeng iti posible nga aramidenna kenkuana isu nga indepensarna laeng iti bagina ket saanna a napuotan a natagbat.
Segun ti suspek, saanna a dinadael ti bonsai a mula ti biktima no diketdi adda laeng inikkatna a sanga ngem isu metten iti rason ti nagrurodan kenkuana ti biktima.
Sakbay iti nasao a pasamak ket immunan a tininggar ti suspek ti biktima agraman ti amana nga ipupokda iti manokda ta isu ti mangdaddadael iti mulana a kanayonna a sibsibogan.
