Nadunor ti maysa a construction worker kalpasan a maipagarup a binansag ti kainuman ti bato iti ulo na idiay Barangay Salvador 1st, siudad ti Candon.
Ti biktima ket agtawen iti uppat a pulo ket uppat, residente ti nadakamat a barangay.
Ti met suspek ket agtawen iti tallopulo ket lima residente ti Barangay Linteg, ili ti Banayoyo.
Basar ti imbestigasion, naginom ti biktima, suspek ken dua pay a kadua da iti pagtaengan ti maysa a giyyem da sakbay nga intuloy da ti panaginom iti pagtaengan ti biktima ket idi naka-inom da pay iti dua a bote ti arak, nagpakada ti biktima a saan nan a kayat ti uminom ken kayat nan ti maturog.
Kalpasan ti sumagmamano a minutos, rimmuar ti biktima iti salas da tapno kitaen no nakapanaw dagiti kakadua nan ket dituy a nakita na ti suspek nga adda iggem na a bato iti igid ti kalsada.
Maipagarup a kellaat nga inbansag ti suspek ti bato nga iggem na ket napuntaan na ti ulo ti biktima sakbay daytoy a naglibas a naglugan ti motorsiklo.
Dagus a naipan iti balay pagagasan ti biktima para ti naan-anay a pannakatamingna ket dagus met a nakaawid iti isu met laeng nga aldaw.
Ngem iti kabigatan na, naawanan manen ti puot ti biktima isu a naitaray iti ospital ket dimmalan iti CT scan ket dituy a naammuan a nagsagaba ti biktima ti traumatic brain injury ken dadduma pay a sakit iti ulo.
Segun ti doktor a nangtaming kenkuana, umabot iti innem agingga walo a bulan ti panagpa-imbag na.
Iti agdama, isagsaganan ti Candon City Police Station ti maiyannatop a kaso kontra ti suspek para iti preliminary investigation.
