Trauma para ken ni Jocelyn Cacayan ti panaganakna gapu iti mapapati a panangpilitda kenkuana idiay Ilocos Sur District Hospital – Narvacan iti baet a marigatan.
Iti pannaki-uman ti Bombo Radyo Vigan ken ni Cacayan a taga-Taleb, Nagbukel, April 20 iti manamnama a panaganakna ngem idi pay laeng parbangon iti April 19 ket nangrugin a naglabor isu a parbangon pay laeng ket nagturongdan idiay Narvacan District Hospital.
Segun ken ni Cacayan, nairana idi nga awan pay laeng iti doktorna isu a ti midwife iti nangasikaso kenkuana ken nangpadas a nangpaanak ket idi marigatan a mangi-normal ket nagaramat ti vacuum tapno maala ti ubing.
Kinunana nga iti baet a mamin-ano a darasna nga ibaga a saanna a kabaelan nga aganak ket binagaan pay laeng ti midwife a rumbeng a kabaelanna ta manon iti anakna.
Idi saan a nagballigi ti midwife ket tinawaganna ti maysa pay a kaduana a midwife a naka-day off ket nagpatulong ngem idi dimteng ket kaskasdi iti pasamak a namin-ano a darasda a vinacuum ti ulo ti maladaga ken naisabaypay iti panangitalmegda iti tiyanna tapno mairuar ti anakna ngem saanda latta a nagballigi.
Idi nakasangpet ti doktor ni Cacayan ket nakitana a narigaten ti sitwasyon dagiti agina isu nga inrefer-na ida a mapanen iti Ilocos Sur Provincial Hospital – Gabriela Silang isu a sinurotda ngem naammoan nga awan ti duty a driver iti ambulansya isu a tinawaganda pay laeng ti driver ket nagurayda iti umabot duapulo a minutos sakbay a nakapan ket patta-pattaenda nga alas dosen iti aldaw iti agturongda iti Gabriela.
Apaman a nakasangpetda iti Gabriela ket nasayaat met iti panangtrato kadakuada dagiti staff iti ospital ket naisayangkat iti pannaka-CS ni Cacayan a gappuananen ti pannakairuar ti anakna ngem gapu iti dunor iti ulo a sinagaba ti maladaga ket naipakaammo a kritikal iti kasasaadna ket iti napalabas laeng ti mano nga oras, saanen a nakalasat pay.
Hustisya met iti kiddaw ti partner ni Cacayan a ni Michael Peralta gapu iti napasamak iti anakda ta aminado a saan a nasayaat iti nagbalin a trato kadakuada dagiti staff iti Narvacan District Hospital ta manipod simmangpetda para iti panaglabor ni Cacayan ket saanda a naasikaso a dagus.
Linagipna pay nga uray idi addada iti uneg iti ambulansya ken manarimaan iti panagturongda iti Gabriela ket pasaray pagsawsaw-anda ni Cacayan ket mapapati nga ibagbagada a “nalaklaka la koma a rumuar ti anakna no saan nga agsangit-sangit”.
Nasakit kenkuana a napasaranda iti dayta isu a kiddawna kadagiti amin nga staff iti nasao nga ospital a sayaatenda iti panangtratoda kadagiti amin a pasyente ta kasapulanda iti tulong saan a ti kinatangsitda.
