Agpada a nadangran dagiti driver ti kurong-kurong ken motorsiklo kalpasan iti panagdinnungparda iti national highway idiay Barangay Labut Sur, Santa, Ilocos Sur itay bigat, June 25, 2026.
Ti nagmaneho ti Honda TMX 125 Tricycle wenno Kurong-kurong ket lalaki nga agtawen iti uppat a pulo ket uppat, naasawaan, construction worker, awanan ti driver’s license nga agnaed idiay Barangay Labut Sur.
Ti met nagmaneho iti Yamaha Mio Gear 125 ket lalaki nga agtawen iti tallopulo ket pito, naasawaan, merchandiser, addaan ti driver’s license nga agnaed idiay Barangay Manueva, Santa.
Iti pannaki-uman ti Bombo Radyo Vigan ken ni PCpt. Rovic Nelmida nga Acting Chief of Police iti Santa Municipal Police Station, apaman a naka-gasolina ti driver ti kurong-kurong ket sumrek koman iti national highway idin saanna a napansin ti sumungad a motorsiklo nga agturong ti bagatan a direksyon a gappuanan iti panagdinnungparda.
Segun ken ni Nelmida, gapu ti impact ket na-fracture ti akin-kannigid a luppo ti driver ti kurong-kurong idinto a ti driver ti motorsiklo ket nagasgasan iti agduduma a paset ti bagina isu nga agoadada a naipaagas iti Ilocos Sur District Hospital – Narvacan para iti pannakatamingda.
Manamnama iti panagsarita ken panagtulag dagiti dua a driver maipanggep iti magastos iti ospital ken iti nadadael a paset dagiti lugan.
