Naikkaten ti pondo para iti medical ken burial assistance program ti Office of the Vice President (OVP) iti national budget ita a tawen.
Nasurok a 180,000 a Pilipino ti nabenepisiaran iti nasao a programa itay napan a tawen.
Nakaawat ti programa iti P920-milion a budget idi napan a tawen, a buklen ti P1.8 bilion a nailatang iti OVP.
Idi 2023, agpapada ti nailatang a pondo ti programa babaen iti P2.3-bilion budget ti OVP.
Insingasing dagiti agpapanday-linteg nga ikkatenen ti pondo para kadagiti proyekto ti social welfare ti OVP ta daytoy ket mapan met laeng a programa ti Department of Health ken Department of Social Welfare and Development (DSWD), isu a nasruok a P733 milion laeng ti naited a pondo ti OVP ita a tawen.
Segun kenni Budget Secretary Amenah Pangandaman a mabalin pay laeng nga ipatungpal ti OVP dagiti proyektona babaen ti panagkiddaw iti grant manipud iti DSWD, ta dagiti agpapanday-linteg ti nangiduron a mang-realign iti kaaduan a pondo ti social assistance ti OVP.
Kabayatanna, agtultuloy ti operasyon dagiti satellite office ti OVP iti laksid dagiti panagkedked dagiti agpapanday-linteg.
