Approved in principle-n iti House Special Committee on the West Philippine Sea ti gakat a panangted ti hazard pay dagiti civilian government personnel a maidepdeploy idiay West Philippine Sea (WPS).
Impaganetget ti chairperson iti komite a ni Malabon Rep. Antolin Oreta III ti kinapateg iti akem dagiti civilian personnel idiay WPS kas iti panangted ti suportar iti maritime operation, scientific research, fisheries protection, logistics support, ken dadduma pay a napapateg nga aktibidad a mangitunda iti peggad iti biagda.
Iti panag-sponsor iti House Bill 8673, impaganetget ni Akbayan party-list Rep. Percival Cendaña iti peggad dagiti maidepdeploy idiay WPS.
Dinakamat ni Cendaña ti civilian personnel a nadunor kalpasan a binomba iti danum ti Chinese Coast Guard (CCG) ti pagluglugananna a barko iti Bureau of Fisheries and Aquatic Resources ken ti kameng ti Philippine Navy a naputedan iti ramay kalpasan nga inatake iti Chinese Coast guard ti naglugananda a barko.
Impaganetgetna a dagiti nasao a klase iti insidente ket mangted ti pammaneknek a rumbeng a maaddaan ti hazard pay dagiti kameng iti gobierno a nakadeploy idiay WPS.
