VIGAN CITY- Patien ni Ramon Casiple, maysa a political analyst a mangidadaulo ti Institute For Political And Electoral Reform a saan a legal battle no di ket “political battle” ti mapaspasamak ditoy pagilian iti nagbaetan ti dati ken agdama nga administirasyon ket mapapapati a kumaro pay kadagiti sumar-saruno nga aldaw.
Ti pannaki-uman ti Bombo Radyo Vigan, kinuna ni Casiple a saan laengen a propaganda ken panagpammarang iti media ti mapaspasamak ta addan ti aksyon nga ar-aramiden ti agdama nga administrasyon nangruna dagiti manglipit kadagiti kaalyado iti administrasyon ni dati a presidente Benigno Aquino III kas iti pannakaikkat ni dati nga Atty. Maria Lourdes Sereno kas chief justice ti korte suprema ken ti naudi ket ti pannakaibabawi ti amnestiya ni Senador Antonio Trillanes IV.
Nu pay kasta, inlawlawag met ni Casiple nga awan pay ti makita na nga epekto iti ekonomiya iti mapaspasamak a laban iti pulitika.
Kabayatanna, inlawlawag na a mabalin nga ibabawi ti presidente ti maysa a presidential proclamation ta nagapu daytoy iti opisina na, saan a ti mismo nagtugaw a presidente iti pagilian ken posible a makemmeg ti senador ta sumangsango idi ti kaso iti civil ken military court idi nagapplikar ken naipaayan ti amnestiya.
