Nasayaaten ti kasasaad ti biktima iti pammaltog a napasamak idiay Barangay Lungog, Narvacan, Ilocos Sur itay alas dos kuarenta iti malem, June 1, 2026.
Ti biktima ket lalaki nga agtawen iti duapulo ket lima, baro, awanan iti trabaho nga agnaed idiay Bangued, Abra idinto a ti suspek ket saan a nabigbig.
Nakaawat ti Narvacan Municipal Police Station iti tawag manipod ti kadua ti biktima ket impakaammona iti napasamak a pammaltog iti nasao a lugar isu a nagresponde dagiti otoridad.
Iti inisyal nga impormasyon ket naammoan a ti biktima ket nakalugan iti Isuzu Elf dump truck ken ti nagreport a kaduana idi adda saanda a nabigbig a lalaki a nakasuot iti puraw a bado ken nagusar iti black sling bag iti immasideg kadakuada ken nagpaputok iti paltog.
Gapu dayta ket nagsagaba iti gunshot wounds iti akin-kannawan nga ima ken tiyan ti biktima idinto a ti suspek ket insigida a naglibas kalpasan iti insidente.
Agtultuloy iti imbestigasyon ken follow-up operations maipanggep iti nasao a pammaltog.
