VIGAN CITY- Addan iti lead dagiti kameng ti linteg idiay San Juan inaig iti panagtakawan a napasamak idiay Brgy. Resurreccion, San Juan idi alas singko ti malem idi kalman, March 15.
Segun ken ni Police Senior Inspector Jade Macaraeg, hepe ti San Juan municipal police station, saan da nga ilaksid ti posibilidad a grupo dagiti agtatakaw iti nangserrek iti pagkaskaseraan da Fatima Florentino Dumacil nga agtawen iti uppat a pulo ket walo, naasawaan, negosyante ken tubo ti South Cotabato.
Naamuan a ti laeng biktima ken ti anak na a babai ti agnanaed iti pagkaskaseraan da ket posible a nabayag a sinipsiputan dagiti suspek ida ta ammo da ti sinerrek da a kwarto.
Maysa laeng ti kwarto a sinerrek dagiti saan pay nabigbig a suspek ngem innala da ti kwarta nga aggatad iti lima gasut a ribo a pisos, naduma-duma nga alahas nga aggatad iti dua gasut a ribo a pisos ken maysa a laptop.
