Saan a palabsen ti Senior Citizen Party-list ti panangkemmeg ken pannakaibalud ni Prudencio Calubid Jr., agtawen iti walopulo ket maysa a nagkamalian a lider ti New People’s Army (NPA) ken consultant ti National Democratic Front of the Philippines (NDFP).
Segun ken ni Senior Citizen Partylist Rep. Rodolfo Ompong Ordanes, adalen dagiti abogadona nu ania ti legal a wagas tapno madusa dagiti nangkemmeg ken nangipabalud ken ni Prudencio karamanen dagiti kameng ti Philippine National Police (PNP), dagiti prosecutor ken dagiti judge ti regional trial court.
Kinuna ni Ordanes a ti agbalin a findings ket ipresentarda iti House Committee on Justice ken Committee on Public Order and Safety kasta payen iti Korte Suprema.
Ti addang ti Senior Citizen Partylist ket kasaruno ti nangwaswas ti basol ti Court of Appeals ken ni Prudencio kalpasan a napaneknekan a napagkamalian laeng ta kanagnaganna ti pudno a target dagiti otoridad.
Makikammayet pay ti partylist iti Department of Social Welfare and Development (DSWD) ken ti Office of Senior Citizens Affairs tapno maipaayan ti rumbeng a pinansya ken pagbiagan ni Prudencio.
