Karaman ni Ramil Madriaga a nagpayam-ammo kas dati nga aide ken maipagarup a bagman ni Vice President Sara Duterte iti duapulo ket lima a testigo a plano nga ipasango ti House prosecution panel iti impeachment trial laban kontra ti bise presidente.
Segun ken ni lead prosecutor representative Gerville Luistro, karaman ni Madriaga iti maipasango mainaig iti kontrobersial a confidential funds ti Office of the Vice President.
Maipalagip nga imbaga ni Madriaga iti panagdenggeg ti House Committee on Justice a maipagarup a naibus iti duapulo ket uppat nga oras ti P5 milyon a confidential funds ti OVP a maipagarup a bilin ni VP Sara.
Karaman pay kadagiti posible nga ag-testigo da dati a Senador Antonio Trillanes IV, dagiti opisial manipud iti Anti Money Laundering Council, Security and Exchange Commission, Ombudsman ken National Bureau of Investigation.
