Kinalikaguman ni Senador Francis “Kiko” Pangilinan ti imbestigasion iti agarup P700-M a gatad dagiti mapapati nga smuggled rice a nasalamaan kadagiti sangladan ti Davao ken Limay, Bataan, gapu ta awan pay ti natiliw a dadakkel nga agipuslit iti laksid dagiti nainget a dusa ti linteg.
Nasalamaan idi napan a bulan ti dua a barko, ti MV Tay Son 2 a naglugan ti 12,500 metric tons ti bagas ken MV Lucky Star a naglugan iti agarup 7,500 metric tons, kalpasan ti mapapati a panaglabsingda iti customs procedures ken saan a nagtunos ti import permit ken aktual a karga.
Nakikoordinar ni Pangilinan iti Department of Justice (DOJ), Department of Agriculture (DA), National Bureau of Investigation (NBI), ken Anti-Agricultural Economic Sabotage Council (AAESC) para iti imbestigasion a manamnama a mangrugi iti umuna a lawas ti Nobiembre, ken impapilitna a saan a nasken a maiserrek dagiti imported a bagas no panawen ti panagapit gapu ta bumaba ti presio ti bagas.
Pinagduaduaan pay ni Pangilinan no apay nga awan pay dagiti dadakkel nga agipuslit a naibalud iti sidong ti Republic Act 12022 wenno ti Anti-Agricultural Economic Sabotage Act, a mangikeddeng iti non-bailable offense para iti agricultural economic sabotage nga aggatad iti di kumurang P10-M, bayat a manamnama a mairuar ti report ti komite maipapan kadagiti napalabas a panagdengngeg maipapan iti nasaknap a panagpuslit iti agrikultura inton kalpasan ti Nobiembre.
