VIGAN CITY- Atapen dagiti kameng ti Santiago municipal police station nga idaulwan ni Police Senior Inspector Froilan Frias nga adda ti koneksyon ti panagtakawan a napasamak iti maysa a transient hotel idiay Sabangan, Santiago idi kalman ken ti napasamak a panagtakawan idiay syudad ti Candon itay kallabes.
Segun ken ni Frias, kitkitaen da a naimbag dagiti CCTV footages a mabalin a makatulong kadakuada tapnu maduktalan nu siasino dagiti nangtakaw iti clutch bag da Domingo Pulido Crusin nga agtawen iti lima pulo ket uppat, naasawaan, technical consultant ken ti asawa na a ni Christine Cruz Crusin nga agtawen iti lima pulo ket dua a taga- Ilang-ilang, Pasay City a naglaon iti tallo a cellphone, driver’s license, naduma-duma a napapateg a dokumento ken mapatta-patta a lima pulo ribo a pisos.
Saan nga ilaksid ti PNP nga adda iti inside job a napasamak iti insidente isu a manarimaan iti profiling da kadagiti empleyado ti nasao a transient hotel.
Inbaga pay ti hepe nga inbilin da idin iti management iti nasao a transient hotel a masapul nga adda ti security guard da tapnu adda agbantay ta adda manen ti customer da idin a natakawan ngem saan nga inkaskaso ti management agingga a naulit iti nasao a panagtakawan idi naminsan nga aldaw.
