Mabalin a maibilang a panaglabsing iti Konstitusion ti panangire-align iti sabali pay a prayoridad ti gobierno ti pondo a saan a naaramat ti Commission on Elections iti baet ti posible a pannakaisanud ti Barangay ken Sangguniang Kabataan Elections.
Dayta ket segun ken ni Comelec Chairman George Garcia, kabayatan nga idurduron dagiti sumagmamano a kongresista ti pannakaisanud ti BSKE ken ti panangire-align kadagiti saan a naaramat a pondo para iti panangsolbar ti gobierno iti krisis iti enerhia.
Segun ken ni Garcia, mabalin a maisanud ti eleksion, ta adda turay dita dagiti kongresista, ngem no aramaten iti sabali a banag ti pondo a nailatang iti eleksion ket saan a mabalin ta maiparit daytoy iti linteg.
Nasurok-kumurang P16 billion ti nabatbati manipud iti P19 billion a BSKE budget ti Comelec nga adda nasurok-kumurang P3 billion a nagastos iti panagsagana.
