Saan a maipalawag ti ragsak a marikrikna ti maysa a newly licensed physician kalpasan a nakapasa iti March 2026 Physicians Licensure Examination ta nagun-odnan ti arapaapna iti baet iti adu a pannubok a simmangbay iti biagna.
Ni Dra. Jadelhyn Calixterio manipod Narvacan, Ilocos Sur ket immunan a nagpanawagan idi March 2022 iti Bombo Radyo Vigan iti kalikagum a masarakan ti pudno a pamiliana.
Napukaw isuna idi 1997 idiay Pangasinan ngem adda ti nangtaripato kenkuana a maysa a pamilia iti Ilocos Sur a nagserbi a bukodnan a pamilia.
Gapu iti interview ket nasarakan isuna iti pudno a pamiliana idi April 2022.
Iti pannaki-uman ti Bombo Radyo Vigan ken ni Dra. Calixterio, napalaus iti panagyamanna ta patienna nga amin a mapaspasamak iti biagna ket pagayatan iti Namarsua isu nga agtalek latta isuna Kenkuana.
Segun ken ni Dra. Calixterio, isagutna iti balligina iti dua a pamiliana – ti nangtaripato ken nangpadakkel kenkuana iti Ilocos Sur ken ti pudno a pamiliana nga ita ket addan iti ballasiw-taaw.
Nagyaman pay isuna iti Bombo Radyo iti tulong a naipaay tapno masarakan ti pudno a pamiliana iti baet iti imposiblen a pannakasapulna idi.
