Kiniddaw ti United People’s Initiative iti Korte Suprema ti pannakaidalan ni Presidente Ferdinand Marcos Jr. iti hair follicle drug test ken irurada ti resultana.
Iti 12-page ti petision idi Abril 10, impaganetget ti UPI nga adda karbengan ti publiko a maamuan ti salun-at ti Presidente, nangruna no makaapektar daytoy iti kabaelanna a mangakem iti trabahona.
Dinakamat ti UPI ti mapapati a nakakita ken ni Marcos iti St. Lukes Medical Center, agraman dagiti imbaga ni Senador Imee Marcos mainaig iti salun-at ti presidente.
Immunan a pinasingkedan ti senador a nagsakit ti presidente gapu ta awan ti mangay-aywan kenkuana iti Malakanyang, ngem pinaglibakan ti Malakanyang.
Malaksid iti drug test, kiniddaw ti grupo iti SC a bilinen ti gobierno a mangiruar iti regular, husto, ken mayannatup iti panawen a medical bulletin no adda kondision ti Presidente a mabalin a mangapektar iti panangidaulona.
