Natay ti maysa a lalaki a nagmaneho iti motorsiklo gapu iti pannakaidungparna iti nakasabatna a kurong-kurong iti San Emilio-Quirino National Road, Malitep road, Brgy. Cayus, Quirino, Ilocos Sur iti oras ti 12:10 PM idi kalman, January 9, 2025.
Ti nagmaneho iti black and white Honda XR a motorsiklo ket ni Lordan Palacio Domas, agtawen iti duapulo ket walo, baro, agnaed idiay Baclingayan, Tubu, Abra idinto a ti nagmaneho iti kurong-kurong ket ni Camilo Borja Dacanay, agtawen iti innem a pulo ket uppat, mannalon nga agnaed idiay Barangay Cayus, Quirino.
Iti pannaki-uman ti Bombo Radyo Vigan ken ni PLt. Jhonny Alibin nga Officer-in-Charge iti Quirino Municipal Police Station, napaspas iti panagpataray iti nakamotorsiklo nga agturong iti bagatan a direksyon idin nadanonna iti nasao a lugar ket saanna a napakadaan iti sumalog a paset nga isu metten iti pannakasabatna iti nakakurong-kurong a nagresultaan iti panagdinnungparda.
Segun ken ni Alibin, nagsagaba ti driver ti motorsiklo iti head injury ta saan a nagusar iti helmet idinto a nadunor iti naduma-duma a paset ti bagi ti driver ti kurong-kurong isu a naipanda iti Quirino Primary Health Facility babaen kadagiti nagresponde a kameng iti Quirino Municipal Police Station, Quirino Bureau of Fire Protection ken Municipal Disaster Risk Reduction and Management Office (MDRRMC).
Nupay kasta ket natay bayat a matamtaming ti nagmaneho ti driver ti motorsiklo kas indeklarar ni Dra. Precious Alfonso.
Impalagip ni Alibin kadagiti motorista iti kanayon a panagaramat iti protective gears ken ti panagannad nga agmaneho tapno saan a maisagmak.
VIDEO – PLT. JHONNY ALIBIN
