Inaprubaran ti national government ti P4 billion a pondo a nakailatang para iti rehabilitation iti imprastraktura idiay Cebu a nadidigra iti maudi a paset iti 2025 gapu iti ginggined ken bagyo a timmama iti probinsia.
Dayta iti pinasingkedan ni Department of Public Works and Highways (DPWH) Secretary Vince Dizon iti panagbisitana manen idiay Cebu tapno inspeksyonen iti sumagmamano a proyekto iti imprastraktura kangrunaan iti Talisay City.
Segun ken ni Sec. Dizon, inaprubaran ni Pres. Ferdinand Marcos Jr. ti P4 billion a pondo tapno maipatakder manen dagiti nadadael nga imprastraktura pakairamanan dagiti pasdek, pagadalan, flood control projects ken dagiti rangtay.
Karaman pay iti pondo ti maysa a feasibility study para iti Mananga river iti siudad ti Talisay a manamnama a maipatungpal sakbay iti panagtutudo tapno maliklikan ti pannakataktak iti trabaho ken masigurado ti kinatalged iti publiko.
Dayta ket Saan laeng a mainaig iti bilin manipod mismo ti presidente no diketdi tapno masigurado iti panangisakit kadagiti residents kangrunaan kadagiti asideg iti bukana iti Mananga river.
